ក្តៅៗ លោកព្រឹទ្ធាចារ្យ វណ្ណ មូលីវណ្ណ ទទួលមរណភាពនៅព្រឹកនេះ នាទីក្រុងសៀមរាប
សៀមរាប ៖ តាមការឲ្យដឹងពីសាច់ញាតិ និង សមត្ថកិច្ចបានឲ្យដឹងថា ព្រឹទ្ធាចារ្យ វណ្ណ មូលីវណ្ណ ស្ថាបត្យករខ្មែរដ៏ល្បីល្បាញ បានទទួលមរណភាពនៅថ្ងៃទី២៨ ខែកញ្ញា ឆ្នាំ២០១៧ វេលាម៉ោង៩និង៤០នាទី ក្នុងគេហដ្ឋានរបស់លោក ស្ថិតក្នុងភូមិមណ្ឌល៣ សង្កាត់ស្លក្រាម ខេត្តសៀមរាប ដោយជរាពាធ។ សាច់ញាតិរបស់លោកបានប្រាប់ថា លោកព្រឹទ្ធាចារ្យ វណ្ណ មូលីវណ្ណ បានទទួលមរណភាពក្នុងជន្មាយុ៩១ឆ្នាំ នៅវេលាម៉ោង៩និង៤៥នាទី នៅព្រឹកថ្ងៃទី២៨ ខែកញ្ញា នេះ។ ពិធីបុណ្យសពរបស់ស្ថាបត្យករខ្មែរដ៏ល្បីល្បាញរូបនេះ ធ្វើឡើងនៅក្នុងគេហដ្ឋានរបស់លោកព្រឹទ្ធាចារ្យ វណ្ណ មូលីវណ្ណ ស្ថិតក្នុងភូមិមណ្ឌល៣ សង្កាត់ស្លក្រាម ខេត្តសៀមរាប។
លោក វណ្ណ មូលីវណ្ណ កើតនៅថ្ងៃទី២៣ ខែវិច្ឆិកា ឆ្នាំ១៩២៦ នៅស្រុករ៉ាម ខេត្តកំពត។ លោកបានទទួលសញ្ញាប័ត្រទុតិយភូមិពីវិទ្យាល័យព្រះស៊ីសុវត្ថិ នៅទីក្រុងភ្នំពេញ ក្នុងឆ្នាំ១៩៤៤ ហើយលោកបានទទួលអាហារូបករណ៍ទៅរៀនផ្នែកច្បាប់នៅទីក្រុងប៉ារីស ប្រទេសបារាំង ក្នុងឆ្នាំ១៩៤៦។ បន្ទាប់ពីសិក្សានៅទីនោះរយៈពេលមួយឆ្នាំ លោកក៏បានប្ដូរទៅរៀនផ្នែកស្ថាបត្យកម្មនៅសាលាវិចិត្រសិល្បៈមួយនាទីក្រុងប៉ារីស។ លោកបានសិក្សានៅ arretche studio ហើយបានបញ្ចប់ការសិក្សាដោយជោគជ័យជាមួយនឹងចំណេះដឹង និង ទេពកោសល្យ។ លោកត្រឡប់មកប្រទេសកម្ពុជាវិញនៅឆ្នាំ១៩៥៥។ មួយឆ្នាំក្រោយមក ក៏ត្រូវបានគេតែងតាំងជាប្រធានស្ថាបត្យករនៅកម្ពុជា។ លោកជាព្រឹទ្ធបុរសទីមួយនៃសាកលវិទ្យាល័យភូមិន្ទវិចិត្រសិល្បៈ (ចាប់ពីឆ្នាំ១៩៦៥ ដល់ ឆ្នាំ១៩៦៧)។
នៅទស្សវត្សរ៍ ៦០ និង ៧០ លោក វណ្ណ មូលីវណ្ណ បានគូរប្លង់ស្ថាបនាអាគារល្បីៗជាច្រើននៅកម្ពុជា ជាពិសេសនៅទីក្រុងភ្នំពេញ។ នៅទីនោះ ស្នាដៃរបស់លោកឈរយ៉ាងសង្ហាប្រដំប្រសងគ្នាជាមួយនឹងសំណង់អាគារបុរាណៗ វត្តអារាម និង សំណល់ពីសម័យអាណានិគម។ កំឡុងសម័យនោះ ដែលគេស្គាល់ថា ជាយុគមាស ស្នាដៃសំខាន់ៗរបស់លោកមានសាលសន្និសីទចតុមុខ អាគារគណៈរដ្ឋមន្ត្រី និង វិមានរដ្ឋ។ លោកក៏បានគូរប្លង់វត្តអារាម និង ស្ថានទូតខ្មែរនៅបរទេសជាច្រើនផងដែរ។
នៅឆ្នាំ ១៩៦២ លោក មូលីវណ្ណ បានរចនាសំណង់កីឡដ្ឋានជាតិ ដែលមានសមត្ថភាពផ្ទុកមនុស្ស ៦០០០០ នាក់ ដែលនោះគឺជាសង្វៀនដែលគេឲ្យតម្លៃជាងគេបំផុតនៅទូទាំងអាស៊ីអាគ្នេយ៍។ កីឡដ្ឋានត្រូវបានសាងសង់ទៅដល់មាត្រដ្ឋានអូឡាំពិក គឺនៅតែជាកន្លែងជួបជុំដ៏ធំបំផុតនៅកម្ពុជា។ ដំបូងឡើយ ត្រូវបានសាងសង់ឡើងនៅក្នុងល្បឿនយ៉ាងលឿន ដើម្បីឲ្យទាន់ពេលធ្វើជាម្ចាស់ផ្ទះល្បែងកីឡាអាស៊ីឆ្នាំ ១៩៦៣ តែក្រោយមកត្រូវបានលុបចោល ហើយត្រូវបានសម្ពោធនៅឆ្នាំ១៩៦៤ អមដោយហ្វូងមនុស្សអបអរសាទរយ៉ាងច្រើន។ ពហុកីឡដ្ឋាននេះ បានទទួលព្រឹត្តិការណ៍សំខាន់មួយចំនួនដូចជា ល្បែងកីឡាក.ក.ប.ថ. និង ប្រធានាធិបតីបារាំងទស្សនកិច្ចផ្លូវរដ្ឋរបស់លោក ហ្សាលដឺហ្គ៊ោល នៅឆ្នាំ១៩៦៦។
នៅឆ្នាំ ១៩៦២ ដដែលនោះ លោកក៏បានស្ថាបនាសាលមហោស្រពជាតិព្រះសុរាម្រិត (មហោស្រពជាតិកម្ពុជា) សាលពិព័រណ៍ដែលនៅជិតខាង ជាមួយនឹងបទពិសោធន៍លំនៅដ្ឋានយ៉ាងទូលំទូលាយ។ ស្នាដៃមួយដ៏សំខាន់ទៀតរបស់លោក គឺការរចនាវិមានឯករាជ្យ ដែលជាទីដ៏សំខាន់មួយបង្ហាញនូវការទាមទារឯករាជ្យពីបារាំងវិញបានទាំងស្រុងនៅឆ្នាំ១៩៥៣ ក្រោមកិច្ចខិតខំប្រឹងប្រែងរបស់ព្រះបាទ នរោត្តម សីហនុ ដែលជាអតីតព្រះមហាក្សត្រនៃព្រះរាជាណាចក្រកម្ពុជា។
នៅក្នុងឆ្នាំ ១៩៧០ សម័យសង្គមរាស្ត្រនិយម ត្រូវបានផ្ដួលរំលំដោយធ្វើរដ្ឋប្រហារ ដែលដឹកនាំដោយឧត្តមសេនីយ៍ លន់ ណុល។ នៅឆ្នាំ១៩៧២ លោក វណ្ណ មូលីវណ្ណ និង គ្រួសារបានភៀសខ្លួនទៅរស់នៅឯប្រទេសស្វ៊ីស។ លោកបានធ្វើការឲ្យ UN Human Settlements Program រយៈពេល១០ឆ្នាំ មុននឹងលោកវិលត្រឡប់មកមាតុប្រទេសវិញនៅឆ្នាំ១៩៩១។ លោកបានចូលប្រើការងារជារដ្ឋមន្ត្រីក្រសួងវប្បធម៌ និង វិចិត្រសិល្បៈ។ បច្ចុប្បន្នសាច់ញាតិកំពុងចាត់ធ្វើបុណ្យសពទៅតាមប្រពៃណី នៅក្នុងគេហដ្ឋានរបស់លោក ស្ថិតក្នុងភូមិមណ្ឌល៣ សង្កាត់ស្លក្រាម ខេត្តសៀមរាប៕
ប្រភពពី៖ kampucheathmey
No comments: